Viðamiklar aðgerðir hafa verið kynntar vegna orkuskipta í samgöngum, sem er ein af megináherslum aðgerðaáætlunar stjórnvalda í loftslagsmálum. Hraðhleðslustöðvum við þjóðveginn verður fjölgað verulega og blásið verður til átaks með ferðaþjónustunni til að stuðla að orkuskiptum hjá bílaleigum, sem hafa víðtæk áhrif á samsetningu bílaflota landsmanna. Þetta kom fram á blaðamannafundi þriggja ráðherra ríkisstjórnarinnar þar sem kynnt voru næstu skref varðandi orkuskipti í samgöngum á Íslandi. Vinna við að greina möguleika varðandi aðra orkugjafa, svo sem vetni, metan og innlent íblöndunareldsneyti, stendur einnig yfir.
