Þann 1. janúar 2020 tóku hertar kröfur varðandi eldsneyti gildi í íslenskri landhelgi, sem í raun bannar notkun svartolíu innan hennar. Bannið er meðal annars liður í að framfylgja aðgerðaáætlun ríkisstjórnarinnar í loftslagsmálum, sem og stjórnarsáttmála. Með útgáfu reglugerðar varð Ísland með einar ströngustu kröfur í heimi hvað varðar notkun svartolíu sambærilegar svokölluðum ECA-svæðum í Eystrasalti og Norðursjó.
Auk tilætlaðs ávinnings fyrir loftslagið er breytingunni ætlað að stuðla að betri loftgæðum við strendur Íslands og hvetja til notkunar á loftslagsvænni orkugjöfum á skipum. Breytingarnar eru í samræmi við alþjóðlegar skuldbindingar Íslands samkvæmt viðauka VI í MARPOL-samningnum sem Ísland fullgilti í febrúar 2018.